Nasunog ang usa ka XRM nga motorsiklo human gilamoy sa kalayo samtang nakaparada gawas sa usa ka panimalay sa PNP Village, Estrada 5th, Barangay Zone 2, Digos City pasado alas 2:00 kaganihang kadlawon.
Sumala sa tag-iya nga si Justine Malud, nakamata ang mga silingan niini human ilang nabantayan nga nagdilaab na ang maong unit, nga bag-o pa lang napalit ug 2 pa lang ka simana sa iyang kamot.
Dugang ni Malud nga adunay na siyay gidudahan kung kinsa ang posibleng nagsunog sa iyang motorsiklo.
Nanawagan karon si Malud sa mga posibleng saksi sa insidente, samtang andam na niyang ipa-blotter ang maong hitabo sa Digos City Police Station karong adlawa.
