KANHING YOUTH LEADER UG ADVOCATE, GIPUSIL-PATAY

Gipusil patay ang usa ka kanhing youth leader and advocate, ug former vice chairperson sa Tagum City Youth Development nga si Lister Kevin Payot Guzman, 32-anyos, single, residente sa Prk. 1, Brgy. La Filipina, Tagum City.

Subay sa report, bandang alas-9 pasado sa buntag, Enero 28, 2026, gipusil ang biktima sa duha ka wala mailhing mamumuno sakay sa motorsiklo nga walay plaka, punting sa nagkadaiyang bahin sa lawas, samtang sakay sa iyang Nissan Navarra nga sakyanan sa Prk. Nangka, Briz District, Brgy. Magugpo East syudad sa Tagum, diin daling misibat ang mga suspek sa wala matino nga direksyon.

Gidala gilayon sa Davao Regional Medical Center (DRMC) ang maong biktima apan gideklara kining nakabsan sa kinabuhi bandang alas-10:43 sa buntag sa samang petsa.

Samtang narekober sa crime scene ang lima (5) ka basiyo sa bala sa gituohang .45 kalibre nga pistola.

Sumala pa sa hepe sa Tagum City Police Station PLtCol Frederick E Deles nga ginalantaw na nila karon ang tanang anggulo aron masuta ang motibo sa maong krimen, diin nagmando na usab kini og deployment sa mga personahe ug dragnet operation lakip ang aktibong koordinasyon sa mga silingang estasyon sa kapulisan aron masikop ang mga suspetsado ug maangkon ang hustisya alang sa maong biktima.