Gilungkab sa wala pa maila nga kawatan ang D.I.Y Turno Branch gabie niadtong Enero 27, 2026 og nakadala ug cash lakip na armas nga issue ngadto sa gwardiya.
Sumala kang PLTCOL. Khisna Asaali, Chief-of-Police sa Dipolog City Police Station nga nataho ngadto sa ilang buhatan ang maong pagpanglungkab kapin kon kulang alas 8:00 na sa buntag sa Enero 28. Dali usab nga gisubay sa mga personahe sa Dipolog CPS ang kalabot sa maong taho.
Sa inisyal nga imbestigasyon, niagi sa likod nga bahin ang kawatan diin adunay hagdan nga paingon sa 3rd floor, gilangkat ang atop sa rooftop ug didto niagi pasulod. Milahos kini panaog sa first floor diin nahimutang ang opisina ug mga vault. Matod pa wala naabri ang vault apan aduna kini buslot nga maoy gigamit aron hulugan sa kwarta nga halin diin didto usab gikuot sa kawatan ang kwarta gamit ang alambre.
Gibana-bana nga anaa sa kapin kon kulang Php90,000.00 ang nakuha nga cash sa kawatan. Gidala usab niini sa pagsibat ang calibre .38 revolver nga issue alang sa security guard sa maong tindahan ug ubang mga butang.
Dili pa usab matino sa kapulisan kung pila ka tawo ang milungkab sa maong tindahan apan duna na silay person of interest tungod aduna nay nadakpan nga suspetsado kaniadto sa pagpanglungkab nga susama ang gihimo nga miagi sa rooftop pinaagi sa paglangkat sa atop.
Gihulat pa usab sa kapulisan ang cctv footage sa D.I.Y diin gikinahanglan pa nga e request gikan sa main office aron usab masuta kung pila ka tawo ang milungkab sa maong tindahan ug sa posibleng pag-ila sa kawatan.
