Nadiskubrehan sa mga archaeologist ang giila karon nga pinakakaraang artwork sa kalibutan, usa ka pulang hand stencil nga gibanabanaang 67,800 ka tuig na ang kagulangon, sulod sa usa ka langub sa Indonesia.
Ang artwork nakita sa Liang Metanduno Cave sa Muna Island, ug mas karaan kini og hapit 15,000 ka tuig kumpara sa naunang nailhang rekord sa pinakakaraang artwork sa kalibutan.
Gipaila sa mga tigpanukiduki nga ilang gitino ang edad sa artwork pinaagi sa pagsusi sa uranium decay sa mga calcite layer nga naporma ibabaw sa pintura, usa ka modernong siyentipikong pamaagi sa pagdate sa karaang mga butang.
Sumala ni Professor Maxime Aubert, usa sa mga nangunang researcher sa proyekto, ang Sulawesi ug mga kasikbit nga isla adunay usa sa pinakadato ug pinakataas nga artistic culture sa kasaysayan sa katawhan.
Gidugang pa nga ang talagsaong porma sa kamot nagpakita nga ang artwork gihimo sa Homo sapiens, ug nagsuporta sa teorya nga ang unang mga tawo nakahimo na og simbolikong art samtang sila nagapanaw paingon sa Australia.
Ang maong diskubre naghatag og bag-ong kahayag sa evolusyon sa kultura ug arte sa unang mga tawo, ug nagpamatuod sa lawom nga koneksyon sa katawhan sa pagpaambit sa simbolo ug kahulugan sukad pa sa karaang panahon.
Photo Courtesy: BBC
