Giangkon ni Bangko Sentral ng Pilipinas (BSP) Governor Eli Remolona Jr. nga posible ang pag-ubos sa bili sa piso hangtod sa P60 kada dolyar, apan gipasabot niya nga dili kini lagmit mahitabo sa labing daling panahon.
Sa gipahigayon nga 2026 Annual Reception for the Banking Community sa Pasay, miingon si Remolona nga dili awtomatikong mangilabot ang central bank bisan pa og maabot sa piso ang mga record lows niini bag-ohay lang. Matod niya, magdepende ang lihok sa BSP sa paagi kon giunsa pag-abot sa Php 60—kon paspas ba kini o hinay-hinay nga pagkunhod. Miingon siya nga depende kini kon giunsa pag-abot sa kantidad, ug gidugang niya nga dili tungod kay niabot na kini sa 60, depensahan na kini dayon sa ahensya.
Mahimong panalipdan sa BSP ang bili sa piso pinaagi sa pagpasaka sa interest rates o pagbaligya sa foreign exchange reserves aron makontrolar ang suplay sa dolyar.
Natala ang bili sa piso sa Php59.46 niadtong miaging semana ug niabot pa gani sa kinahunggan nga intraday low nga Php59.50. Nanira kini sa Php59.09 niadtong Biyernes ug nagsugod sa Php58.97 niadtong Lunes.
Sumala sa Malacañang, dili gusto ni Pangulong Ferdinand Marcos Jr. nga moabot sa Php60 ang piso tungod kay mosaka ang utang sa nasod.
Nagpadayag usab og kabalaka ang pribadong sektor bahin sa pagkahuyang sa piso. Miingon si Hans Sy sa SM Prime nga bisan og misaka ang halin sa retail tungod sa paghinay sa piso, nabalaka siya sa epekto niini sa ubang negosyo ug sa kinatibuk-ang ekonomiya sa umaabot kay kon maapektuhan ang ubang patigayon, dili kini maayo alang sa nasod.
Sa laing bahin, giingon ni Alexander Lao, presidente sa Cebu Pacific, nga usa kini ka dakong kabalaka tungod kay hapit 70 porsiyento sa ilang gasto anaa sa dolyar, ug mahimong kinahanglan nilang usabon ang presyo sa mga tiket kon magpadayon ang pag-ubos sa bili sa piso.
Photo courtesy: Business World Online
