Giinspeksyon ni Department of Public Works and Highways (DPWH) Secretary Vince Dizon ang Mananga River sa Syudad sa Talisay, lalawigan sa Sugbo kagahapong adlawa, Enero 27, 2026.
Giubanan si Dizon ni Talisay City Mayor Gerald Anthony Samsam Gullas ug sa bag-ong gitudlo nga DPWH Region 7 Director Simon Arias diin nahisgutan ang parehong short ug long-term nga solbad sa problema sa nagpalibot sa sapa.
Matod ni Dizon nga ang maong lakang ubos sa mando ni Presidente Ferdinand Bongbong Marcos Jr. diin himuon nga prayoridad ang masolusyonan ang sitwasyon sa flood management sa Cebu. Tungod sab sa naagian sa syudad nga grabeng epekto sa pag-igo sa bagyong Tino.
Lakip sab sa natuki mao ang pagsusi sa kahimtang sa maong dapit gumikan sa plano nga paglimpyo, pag-ayo ug pagpalig-on niini labi na kung mobunok ang uwan.
