Patay ang usa ka 51-anyos nga mag-uuma human kini gidunggab sa 32-anyos nga suspetsado nga nahitabo sa may Purok 2, Barangay Canipay Norte, Midsalip, Zamboanga del Sur, gabie sa Enero 27, 2026.
Ang biktima dali nga gidala sa Midsalip Infirmary Hospital ug gibalhin ngadto sa Zamboanga del Sur Medical Center sa Pagadian City, apan gideklara nang dead on arrival sa miatiman nga doctor.
Base sa inisyal nga imbestigasyon sa kapulisan, igo lang mibadlong ang biktima sa nabating kasaba sa motorsiklo sa suspetsado nga misangpot sa panaglalis ug panagsumbagay.
Tungod sa panaglalis, mibunot ang suspetsado sa dalang kutsilyo ug gidunggab sa makadaghang higayon ang biktima.
Tulo ka samad dinunggaban ang naangkon sa biktima igo sa wala nga dughan, duha sa wala nga likod ug pagkalaslas sa wala nga bukton.
Sa gilusad nga follow-up operation, nadakpan sa kapulisan sa Midsalip Municipal Police Station ang suspek ug anaa na karon sa kustodiya sa kapulisan, samtang giandam ang pagsang-at sa angay nga kaso batok kaniya.
