Patay ang usa ka mag-uuma human kini giluba sa kainom atol sa family reunion ug pagsaulog sa kapistahan sa Barangay Upper Nilo, Tigbao, Zamboanga del Sur, niadtong adlaw’ng Sabado.
Ang biktima nagpangidaron ug 40-anyos, lalaki samtang ang suspetsado nagpangidaron ug 47- anyos, ulitawo, walay trabaho nga managsama nga lumulupyo sa maong lugar.
Sa inisyal nga imbestigasyon sa kapulisan sa Tigbao Municipal Police Station, ang biktima ug suspetsado nagkauban pa sa panagtagay sa ilimnong makahubog nga miresulta sa ilang panaglalis.
Tungod sa panaglalis gidunggab sa suspetsado ang biktima sa makadaghang higayon gamit ang hunting knife nga na-recover ra usab sa kapulisan pipila ka metros gikan sa crime scene.
Nadapatan pa sa BFP Tigbao ang biktima ug first aid ug daling gidala sa Tigbao Rural Health Unit apan gideklara nang dead on arrival ang biktima sa miatiman nga doctor.
Naglunsad usab dayon ug hot pursuit operation ang kapulisan sa Tigbao aron masikop ang suspetsado ug mapapanubag kini sa iyang salaod.
