Gilunsad sa Digos City District Jail–Male Dormitory (DCDJ-MD) ang Valentine’s Sports League niadtong Miyerkules sa hapon, Enero 14, 2026, alas 3:00 sa hapon, isip kabahin sa mga programa nga nagpalig-on sa lawas, hunahuna, ug panaghiusa tali sa mga Persons Deprived of Liberty (PDL) ug personnel sa piitan.
Pormal nga giablihan ang kalihukan pinaagi sa Parade of Teams nga gipangulohan sa mga miapil nga basketball ug badminton teams, gisundan sa roll call aron pormal nga mailhan ang matag magduduwa. Ang kahilokan nagtumong sa panaghiusa, disiplina, ug sportsmanship sulod sa pasilidad.
Sa Welcome Message, gipasiugda ni JCINSP Jul Akbar L. Jamiri, Jail Warden sa DCDJ-MD, ang dakong papel sa sports sa paghulma sa disiplina, camaraderie, ug holistic nga rehabilitasyon sa mga PDL.
Naghatag usab og Inspirational Message si G. Manolito J. Amandoron, Private Secretary II sa City Mayor nga si Hon. Josef Fortich Cagas, nga nag-awhag sa mga PDL ug personnel nga tan-awon ang sports isip usa ka epektibong paagi sa pagpalambo sa karakter, paglig-on sa kaugalingon, ug positibong kausaban sa kinabuhi. Iyang gipasiugda ang bili sa paglaum, self-discipline, ug teamwork, dili lamang sa duwa kondili usab sa personal nga pagtubo ug rehabilitasyon.
Gisundan kini sa Oath of Sportsmanship nga gipahigayon ni JO1 Bienvenido Gelicame, nga nagpahinumdom sa tanan sa bili sa hustisya, respeto, ug integridad. Ang ceremonial ball toss nga gipangulohan sa Jail Warden maoy pormal nga timaan sa pagsugod sa Valentine’s Sports League.
Sa ikaduhang bahin sa programa, gipahigayon ang Exhibition Games sa basketball ug badminton. Usa sa mga tampok nga hitabo mao ang basketball exhibition game tali sa DCDJ-MD personnel ug piniling PDL players, nga nagpakita sa mutual nga respeto ug kooperasyon. Anaa usab ang badminton exhibition game nga giapilan sa DCDJ-MD female personnel, nga nakatampo sa pagpalig-on sa morale ug positibong pakig-uban sulod sa pasilidad.
Hapsay ug malinawon nga gipangulohan ang tibuok programa ni PDL Romark Montebon isip host, nga nagpakita sa iyang pagsalig sa kaugalingon ug sa abilidad sa mga PDL nga aktibong makaapil sa mga mapuslanon ug makab-ot nga kalihukan.
Ang Valentine’s Sports League kabahin sa rehabilitation ug development programs sa BJMP, nga nagtumong sa pagpalambo sa pisikal nga kahimsog, emosyonal nga kaayohan, ug positibong pamatasan sa mga PDL. Pinaagi sa sports, padayon nga ginapalig-on sa DCDJ-MD ang ilang paningkamot alang sa makatawhan nga pag-atiman, reformation, ug community-oriented corrections.
