Gi-anunsyo sa Coast Guard Station Davao Oriental nga naka-heightened alert ug full standby status na ang ilang mga personahe agig pagpangandam sa posibleng epekto sa Tropical Depression ADA.
Sumala sa ahensya, magpabiling lig-on ang ilang serbisyo bisan pa sa hulga sa dili maayong panahon ug andam usab ang mga personahe ug rescue assets niini nga i-deploy sa bisan unsang oras aron masiguro ang kaluwasan sa katawhan, ilabina sa mga mangingisda ug mga komunidad sa kabaybayonan.
Gipasalig sa Philippine Coast Guard (PCG) nga padayon silang anaa aron mutabang, muluwas ug magpanalipod sa publiko bisan pa sa dili maayong kahimtang sa panahon o sa posibleng katalagman.
Gihangyo usab sa PCG ang katawhan nga magpabiling alerto, mutuman sa mga pahimangno sa mga otoridad ug likayan ang pagbyahe sa kadagatan kon dili paborable ang dagan sa panahon aron malikayan ang bisan unsang insidente.
