Gipahibalo sa lokal nga kagamahanan sa Iligan ang tanang establisemento sa syudad, ilabi na ang mga kan-anan ug coffee shops, nga obligasyon nilang sundon ang mga balaod nga naghatag og diskwento sa mga senior citizen ug mga person with disabilities PWDs.
Sumala sa mga gipatumang balaod, lakip ang Republic Act No. 9994 o ang Expanded Senior Citizens Act of 2010 ug Republic Act No. 10754 nga nagpalapad sa mga benepisyo ug pribilehiyo sa mga PWDs, gikinahanglan nga ihatag sa mga benepisyaryo ang angay nga diskwento sa tanang sakop nga transaksyon.
Ang pahimangno sa LGU misunod human may nadawat nga mga reklamo kabahin sa pipila ka establisyemento nga matod pa wala motuman sa maong diskwento.
Gipahinumduman usab ang mga nanag-iya ug negosyo nga ang dili pagtuman sa balaod mahimong mosangpot sa mga silot, lakip ang multa ug posibleng pagbawi sa ilang business permit.
Samtang, gidasig ang mga senior citizen ug PWDs nga magpahibalo dayon sa lokal nga kagamhanan kung makasinati sila og pagdumili sa mga diskwento nga gitakda sa balaod.
