Gibutyag sa Iligan City Police Office (ICPO) ang mga detalye sa ilang padayon ug lig-on nga kampanya batok sa nagkalain-laing iligal nga kalihokan sa dakbayan sa Iligan, lakip na ang illegal gambling, illegal logging, ug illegal mining.
Sumala ni PMAJ Zandrex Panolong, Police Information Officer sa ICPO, nga naka-focus ang ilang operasyon ilabi na sa mga hinterland barangay sa syudad, nga sakop sa area of responsibility sa Iligan City Police Station 6.
Matod pa niya, ang maong mga lugar mao ang kanunay nga target sa iligal nga kalihokan, busa gikinahanglan ang padayon ug istriktong pagbantay sa kapulisan.
Gipasiugda usab ni PMAJ Panolong nga dako kaayo ang papel ug kontribusyon sa Iligan City Police Station 6 sa pagpatuman sa tanang anti-criminality programs sa Philippine National Police.
Pinaagi sa hiniusang aksyon, koordinasyon, ug determinasyon sa kapulisan, ilang gitinguha nga mapanalipdan ang kalinaw, kahimtang sa kinaiyahan, ug seguridad sa katawhan batok sa mga kalihokang supak sa balaod.
