Nagkahiusa ang mga lideres sa Probinsya sa Davao de Oro sa pagplano aron mapalapad ang mga serbisyo ug matuman ang mga gikinahanglan nga proyekto alang sa katawhan, ilabi na ang gilauman nga proyektong patubig sa Poblacion, Nabunturan.
Sa pakighinabi sa Jaunder Radyo News Team, gipahayag ni Nabunturan Vice Mayor Cyrian A. Reterba nga andam na ang lokal nga panggamhanan sa pagpatuman sa dagkong mga proyekto nga magahatag og dugang nga kaayohan sa mga residente sa lungsod.
Matod pa sa bise alkalde, giprayoridad karon ang Lungsod sa Nabunturan tungod kay kini ang capital town sa Probinsya sa Davao de Oro, hinungdan nga gikinahanglan ang mas daghang imprastraktura ug serbisyo alang sa katawhan
Dugang pa niya, padayon ang paningkamot sa mga opisyales ug lideres sa probinsya aron mas daghang mga proyekto ang maimplementar sa tuig 2026, nga tumong magpalambo sa kalidad sa kinabuhi sa mga lumulupyo sa lungsod.
Sa kasamtangan, nagpadayon ang Panggamhanan sa Probinsya sa Davao de Oro sa pagplano ug pagtinabangay aron masiguro ang epektibo ug hustong paghatod sa serbisyo alang sa katawhan.
