Gipaila sa GCash ang bag-ong sistema diin ang one-time password o OTP madawat na direkta sulod sa app. Matod sa kompanya, dakong tabang kini sa pagpanalipod sa mga user batok sa mga scammer nga kasagaran naggamit sa OTP nga ginapadala pinaagi sa text message.
Aron makadawat sa in-app OTP, gikinahanglan lang nga i-activate sa user ang push notifications sa GCash app sa ilang cellphone. Pinaagi niini, masiguro nga ang OTP makadawat lang sa tinuod ug awtorisadong tag-iya sa account.
Gipasabot usab sa GCash nga mas paspas ug mas sayon na ang mga transaksyon tungod kay dili na kinahanglan molukso sa lain-laing app o maghulat pa sa text message.
Samtang niini, giawhag sa Bangko Sentral ng Pilipinas ang mga bangko ug pinansyal nga institusyon nga magpatuman og mas lig-on nga pamaagi sa multi-factor authentication, isip dugang proteksyon sa publiko.
Photo Courtesy: Fintech Futures
