Patay ang 43-anyos nga lalaki human nga gipusil sa duha ka wala mailhing suspetasdo, sa Purok Kawayan, Barangay De Venta, Munisipyo sa Polanco, Zamboanga del Norte, alas 5:50 sa buntag niadtong Enero 12, 2026.
Kini ang gikumpirma sa Zamboanga del Norte Police Provincial Office (ZNPPO) diin matod pa taga Barangay New Tangub, Munisipyo sa Sergio Osmeña ang maong biktima.
Sumala sa inisyal nga imbestigasyon nasayran nga nagbiyahe paingon sa Polanco ang biktima sakay ang 30-anyos nga babaye nga backrider, single, ug taga Barangay Nemenio, lungsod sa Josefina, Zamboanga del Sur, kinsa nakaangkon usab og mga samad ug kasamtangang nagpatambal sa hospital.
Daling usab nga misibat ang mga suspek paingon sa Barangay Macleodes, lungsod sa Polanco.
Samtang dali nga miresponde ang kapulisan ug nagpahigayon sa pagproseso sa eksena sa krimen pinaagi sa SOCO, ug nakig-alayon sa kasikbit nga mga istasyon sa pulisya ug sa 1st Provincial Mobile Force Company alang sa dragnet ug hot pursuit operations.
Sa pagkakaron, wala pa matino ang motibo sa maong insidente. Ang tanan nga posibleng mga anggulo gisusi aron mahibal-an ang hinungdan sa pagpamusil ug aron mailhan og manubag sa balaod ang mga responsable.
Ang ZNPPO nagpasalig sa publiko nga ang tanang gikinahanglang aksyon gihimo aron masulbad ang kaso ug mamentinar ang kalinaw ug kahapsay. Giawhag ang publiko nga i-report ang bisan unsang kasayuran nga adunay kalabotan sa maong insidente sa labing duol nga istasyon sa kapulisan.
Photo Courtesy: QRT Sergio Osmeña
