Narekober sa kapulisan ang kinawat nga motorsiklo gikan sa suspetsado nga 22-anyos nga babaye human kini masakpan sa akto nga nangawat sulod sa Philippine Red Cross Office, Provincial Government Complex, Barangay Dao, Pagadian City, niadtong nakalabay nga adlaw.
Subay sa report sa kapulisan, ang maong motorsiklo nga Yamaha Mio gravis nga nabawi gikan sa suspetsado gipanag-iyahan sa usa ka retiradong AFP personnel nga residente sa Molave, Zamboanga del Sur.
Segon pa, ang maong motorsiklo gikawat sa babaye nga suspetsado samtang kini nakaparking gawas sa usa ka restaurant sa Capistrano Street, Barangay Maololoy-on, Molave, Zamboanga del Sur.
Gi-angkon sa retiradong AFP nga nahimong napadali ang pagkawat sa suspetsadong babaye sa iyang motorsiklo gumikan kay nagtangag lang ang yawe ug wala niya naibot gikan sa ignition key.
Niini, gigamit matod pa sa suspetsado ang maong motorsiklo paingon sa syudad sa Pagadian partikular sa Philippine Red Cross aron unta mangawat nga nakaalarma sa mga personahe gumikan sa bitbit niining armas.
Dali nga gitaho sa mga security personnel ngadto sa mga kapulisan ang hitabo hinungdan usab sa dali nga pagka-aresto sa suspetsado nga karon nakatanggong na sa selda sa Pagadian City Police Station.
Lakip sa narekober gikan sa posisyon sa suspetsado mao ang usa ka 9mm Taurus pistol, usa ka laptop, ug ang tablet, nga karon pulos na nakakustodiya sa kapulisan alang sa mas lawom nga imbestigasyon.
Photo Courtesy: PD ZSPPO, PRO 9
