Gibutyag sa kadumalahan sa Business Permits and Licensing Office (BPLO)- Iligan City nga walay kausaban sa mga requirements ug pagproseso sa pagkuha ug pag-renew sa business permit karong tuiga.
Kini ang gibutyag ni Maria Rhodora Omlero, Division Head sa Permits and Licenses Division sa City Mayor’s Office–Iligan, atol sa esklusibong pakighinabi sa Juander Radyo News Team.
Sumala ni Omlero, nagpabilin gihapon ang mga kwalipikasyon sa pagkuha sa business permit. Apan adunay mga update nga may kalabutan sa Property Index Number (PIN) nga gipangulohan sa City Assessor’s Office, ilabi na sa mga property nga gigamit sa negosyo.
Matod pa niya, aron mas mapasayon ang pagproseso alang sa mga kliyente, dili na kinahanglan nga moadto pa sa buhatan sa Assessor’s Office kay ang pag-update sa PIN number mahimo na mismo sa BPLO.
Ang mga kawani sa assessor na mismo ang mobisita sa City Hall aron magpatuman sa maong update, lakip na usab ang pagbisita sa Gaisano Mall ug Robinson’s Mall alang sa susamang katuyoan.
Gidugang pa ni Omlero nga ang mga kliyente nga magpa-update sa ilang PIN number kinahanglan una mokuha og priority number gikan sa guard.
Human ma-update ang PIN sa gitahasang mga kawani sa Assessor’s, mahimo na dayon silang mopadayon sa BPLO alang sa pag-renew sa ilang business permit.
