Usa ka 23-anyos nga lalaki gikan sa Zhengzhou, Probinsya sa Henan, China, ang nag-antos sa grabeng kasakit human siya mitoo sa usa ka “traditional remedy” nga iyang nakitan online.
Wala pa mahibal-i kung giunsa pagkakita niini nga batan-on ang maong katingad-an nga tambal, apan ang sigurado mao nga nakumbinsir siya sa “milagrosong epekto” niini mao nga naningkamot siya sa pagpangita ug pagpalit og buhing lintâ.
Human makakuha og lintâ, kining lalaki nga giila pangalan nga Zheng, misunod sa mga instruksyon gikan sa internet ug gipasulod ang mananap ngadto sa iyang pantog pinaagi sa iyang agianan sa ihi (urethra). Tungod niini, nabara ang iyang agianan sa ihi nga maoy hinungdan sa grabeng kasakit ug wala na siya kaihi.
Apan wala lang nipuyo ang lintâ sa agianan; nikamang kini pasulod sa iyang pantog, nipilit sa maong organo, ug nagsugod og pagpagawas og mga anticoagulant (kemikal nga mopugong sa pagbag-id sa dugo).
Tungod sa dili na maagwanta nga kasakit, napugos si Zheng sa pag-adto sa emergency room sa usa ka lokal nga ospital. Nakugang ang mga doktor sa iyang gisulti. Pinaagi sa usa ka ultrasound, nakumpirma nga aduna gayud lintâ sa sulod sa iyang pantog.
Usa ka grupo sa mga doktor, nga gipangulohan sa deputy director sa urology department, ang mipahigayon og operasyon nga gitawag og transurethral bladder foreign body removal aron makuha ang lintâ. Human sa operasyon, nakaihi na og balik si Zheng ug nawala na ang iyang kasakit.
Gigamit sa mga doktor kining maong hitabo isip usa ka panig-ingnan aron pasidan-an ang publiko nga moadto sa tinuod nga mga doktor ug mosalig sa siyensya, imbes nga motuo sa mga tambal nga walay basehanan ug makadaot lang sa lawas.
“Ang operasyon mismo adunay mga risgo ug mahimong makadaot sa urethra ug pantog. Mahimo kini magbilin og dugay nga pag-antos sama sa kanunay nga kasakit, problema sa pag-ihi, balik-balik nga impeksyon, ug paghiktin sa agianan sa ihi,” matod ni Dr. Shan Zhongjie, ang direktor sa Department of Urology sa Zhengzhou People’s Hospital.
Photo courtesy: Oddity Central
