Gipahibalo sa buhatan sa Social Security System kon SSS–Iligan ang publiko kalabot sa bag-ong programa sa online generation sa UMID Card, ilabi na alang sa mga miyembro nga gustong makakuha og SSS ID pinaagi sa digital nga pamaagi.
Matod pa ni Jose Roel Herbieto, Branch Manager sa SSS–Iligan, nga ang mga gustong mo-avail sa maong serbisyo kinahanglan lamang mo-log in online ug magparehistro sa My.SSS portal.
Sumala pa niya, sa My.SSS, kinahanglan i-fill up sa aplikante ang gikinahanglan nga impormasyon sama sa SSS Number, address, ug email address.
Human niini, maghimo ang aplikante sa iyang user ID ug password.
Kung makompleto na ang tanang detalye, i-submit ang aplikasyon ug hulaton ang approval.
Sa dihang ma-aprubahan na, magpadala ang SSS og kumpirmasyon ug password pinaagi sa email, nga gamiton sa pag-log in sa My.SSS account.
Gidugang pa ni Herbieto nga sa My.SSS portal na usab makita ang status sa issuance sa UMID o SSS ID Card, nga mas sayon ug mas paspas alang sa mga miyembro.
