Nagtinguha ang Department of Education Region – Central Visayas kun DepEd 7 nga sugod karong tuig 2026, masugdan na ang pagtukod sa dugang mga classrooms ilabina nga nakasinati og kadaot ang pila ka mga classrooms ug ang uban, di na luwas gamiton human sa pagtay-og sa linog sa amihanang bahin sa lalawigan sa Sugbo.
Gawas pa niini adunay mga backlogs nang daan nga mga classrooms alang sa mga pampublikong tunghaan.
Namahayag si DepEd 7 Regional Director, Salustiano Jimenez, nga aduna gihapoy mga backlogs dili lang sa mga classrooms, apan lakip usab sa mga magtutudlo.
Hinuon, matod ni Jimenez nga aduna nay lakang nga gihimo ang DepEd- 7, diin ilalom sa Public – Private Partnership, nakig-alayon ang DepEd sa mga pribadong sector aron mahatagan og pagtagad ang uban nga mga kakulangon sama sa internet connection, laptops, ingon man classrooms.
Ang DepEd ang motutok sa mga kakulangon ug ang mga partner sa DepEd nga private sector ang mamahimo nga moabag sa mga kulang. Lakip sa nalambigit sa pagtubag sa mga kakulangon sa natad sa edukasyon mao ang mga lokal nga panggamhanan diin aduna nay mga pakigpulong ang DepEd aron masuta unsa ang mamahimo nga ikatampo sa mga partners niini alang sa edukasyon.
