Naputos og bun-og sa nawong ug kalawasan nag usa ka driver human kini gitabangan og kulata sa mga residente sa alegasyong nakaligis kini og 3-anyos nga bata, sa lungsod sa Taganaan, Surigao del Norte niadtong nakalabay nga adlaw.
Gikompirma ni PMAJ MOHAMMAD FAHAD D JULWADI, Chief of Police sa Taganaan PNP nga nasuko ang mga tawo ug dili na mapugngan ang ilang kasuko maong giatake ang driver diha-diha dayon pagkahuman sa hitabo.
Gibutyag ni Julwadi nga ang 3-anyos nga bata igo ra nga natumba ug wala kini madasmagan. Apan ang driver dihang naabtan sa mga residente gitabangan og sipa ug pagbunal hinungdan nga nakaangkon og nabun-og.
Daling girespondihan sa kapulisan aron susihon ang tensyon ug giluwas ang driver gikan sa dugang nga kadaot. Giklaro ni Julwadi nga nasulbad na ang maong panghitabo sanglit wala na mopasaka sa reklamo ang duha ka Partido.
