Umentohan ang inadlaw nga suholan sa mga Job Order (JO) personnel sa syudad sa Lapu-Lapu human mapasar ang usa ka ordinansa nga naghatag og ₱60 nga dugang sa sweldo.
Sumala ni Konsehal Annabeth Cuizon, pangulo sa Committee on Finance ug author sa ordinansa, ang giaprobahang pagpasaka sa inadlaw nga suholan sa mga JO personnel gikan sa ₱468 ngadto sa ₱528 magpadayon hangtod sa tuig 2026.
Sa ilawom sa ordinansa, sakop sa wage increase ang tanang JO personnel nga nahire sulod sa calendar year 2025 ug nakareport sa trabaho sa gitakdang panahon.
Lakip usab sa benepisyo ang compensation differential para sa mga kwalipikadong JO personnel nga maglangkob sa panahon gikan Enero 1 hangtod Nobyembre 30, 2025.
Gisupurtahan sa lokal nga kagamahanan sa dakbayan sa Lapu-Lapu ang maong lakang isip pag-ila sa kontribusyon sa mga JO personnel ug suporta sa ilang panginabuhian, ilabina atol sa padayon nga pagtaas sa gasto sa palliton.
