3 KA INDIBIDWAL DAKPAN SA DRUG BUY-BUST OPERATION

Arestado ang usa ka 18-anyos nga babaye human napalitan sa gituohang shabu niadtong nakalabay nga adlaw sa Prk. Buli, Brgy. Visayan Village syudad sa Tagum.

Giila ang suspek nga si alyas Laika, walay trabaho, temporaryong nag-abang sa Prk. Buli, Brgy Visayan Village Tagum City, ug lumad nga residente sa Brgy. Hijo Maco, Davao de Oro. Napalitan kini og usa ka pakete sa gituohang shabu gamit ang mga markadong salapi nga usa ka genuine Php500 bill ug unom ka counterfeited Php1000 bill.

Nakuha usab sa posesyon sa usa ka alyas Jhian, 19-anyos, live-in partner sa subject, walay trabaho, residente sa Prk. Macopa, Brgy Visayan Village Tagum City ang lain pang upat ka pakete sa gituohang shabu.

Samtang arestado usab sa maong operasyon si alyas Jeffrey, 34-anyos, single, walay trabaho, residente sa Prk. Macopa, Brgy. Visayan Village Tagum City diin nakuha sa iyang posesyon ang tulo ka pakete sa gituohang shabu atol sa pagrekisa niini sa operatiba. Gibana-banang motimbang sa kapin kon kulang 3 gramo ang mga nasakmit nga ilegal nga droga nga nagkantidad og PHP20,400 subay sa Standard Drug Price.

Sa pagkakaron giproseso na sa mga otoridad ang tukmang lakang alang sa mga dinakpan samtang gikatakda nang pasakahan ang tulo og kasong paglapas sa Republic Act 9165 kon Comprehensive Dangerous Drugs Act of 2002.