Kapin 1.68 milyong residente sa Caraga Region ang karon nakatagamtam sa libre nga Wi-Fi service sa gobyerno, subay sa programa sa Department of Information and Communications Technology (DICT-13).
Sa pahayag sa DICT-13, gipahibalo nga sa tuig 2025 nakapatukod ang ahensya og 674 ka free Wi-Fi access points sa nagkalain-laing probinsya sa rehiyon. Ang maong mga access point adunay 95% availability sa libreng internet alang sa katawhan.
Sa kinatibuk-ang ihap, 88 ka access point ang naa sa Agusan del Norte, 100 sa Agusan del Sur, 203 sa Surigao del Norte, 106 sa Surigao del Sur, 96 sa Dinagat Islands, ug 81 sa Butuan City.
Samtang sa Butuan City, gipahayag sa DICT-13 nga 131 ka mga government offices, lakip ang mga eskwelahan, ang konektado na sa internet pinaagi sa maong programa. Sa maong ihap, 94 ka national government agencies, 18 ka local government agencies, duha ka state universities, 12 ka public schools, tulo ka public health facilities, ug duha ka public libraries ang nakabenepisyo.
Gipaabot sa DICT-13 nga padayon nilang palapdan ang maong programa aron mas daghan pang Caraganon ang makatagamtam sa lig-on ug libreng koneksyon sa internet.
Photo cortesy: DICT-13
