Gisugyot ang Project Daloy ni EnP Karl Sam Maquiling, Division Head sa Research, Planning, IEC, Monitoring, and Enforcement sa Iligan City Environment and Natural Resources Office (ICENRO), ngadto sa Iligan City Disaster Risk Reduction and Management Council (ICDRRMO) isip solusyon sa pagbaha sa syudad.
Gipasiugda sa proyekto ang pagpalawom sa mga sapa, pagbutang og riparian buffers o kakahuyan daplin sa sapa, ug pagbag-o sa kinaiya sa katawhan batok sa pag-quarry ug paglabay og basura. Matod pa ni Maquiling, kini makatabang aron mas dali makalusot ang tubig gikan sa uplands paingon sa Iligan Bay, samtang masagang sa mga kahoy ug tanom ang kusog sa bul-og sa tubig, ug maprotektahan ang kabalayan ug economic activity sa mga barangay nga dunay dagkong suba sama sa Mahayahay, Mandulog, ug Pugaan.
Gisugyot usab ang pag-improve sa ICENRO nursery, pagpanum og kawayan daplin sa sapa, aktibong paglihok sa council, pagdugang og Deputized Ecology Officers, ug pag-maximize sa existing nga polisiya. Gibase ang proyekto sa coastal vulnerability assessment gikan sa Department of Environment and Natural Resources – Mines and Geosciences Bureau.
Gidayeg sa Ecoweb ang Project Daloy tungod kay cost-effective ug dako ang epekto, ug gilauman nga sa sunod tuig magahinan og pondo para sa detalyado nga long-term plan niini.
Photo courtesy to: ICPO
