Nagpabiling hinay ang paggasto sa mga konsumidor karong panahon sa holiday, bisan pa man sa nagkaduol nga adlaw sa Pasko. Kini base sa real-time monitoring sa Philippine Amalgamated Supermarkets Association (PASA).
Sumala ni PASA President Steven Cua, wala pa kaayo makatala ang mga supermarket, mall, ug mga retail outlet og dagkong bulto sa mga produkto nga gipamalit sa pagkakaron.
Sa pagkakaron, ang natala pa lamang sa mga kompanya ang mga bulk purchase o bultuhang pagpamalit gikan sa mga dagkong korporasyon ug mga negosyante. Kini nga mga pinamalit gitagana aron ipang-apud-apod ngadto sa ilang mga empleyado isip mga Christmas giveaway.
Bisan pa niini, naglaum ang grupo nga magsugod ang pagdagsa sa mga pamilya sa mga mall ug retail outlet mga upat ka adlaw sa dili pa ang Pasko o mas mubo pa niana.
Matud pa ni Cua, naanad na ang kadaghanan sa pagdali-dali og pamalit (last-minute shopping), samtang ang uban usab wala pay igong oras sa pagpamalit tungod sa ilang mga trabaho.
Sa kasamtangan, gipasalig sa PASA nga walay kinahanglanon nga patas-an ang presyo sa mga palitonon. Nagpabiling igo ang supply ug stock sa mga produkto aron matubag ang panginahanglanon sa publiko sa tibuok panahon sa holiday.
Photo courtesy: Gourmet Pro
