Gibutyag sa Iligan City Traffic Parking and Management Office o ICPTMO nga ang panahon sa Pasko usa sa pinakadakong hagit sa buhatan tungod sa grabeng kahuot sa trapiko nga sagad masinati sa siyudad.
Matod pa ni Ralph Oblenda, Head sa ICPTMO, ilang gipangandaman kining mga hagit pinaagi sa pagplano sa mga road repair, pag-manage sa padagsa sa mga tawo nga mouli gikan sa nagkalain-laing probinsya aron magselebrar sa Pasko, ug sa pagdaghan sa mga Iliganon nga moadto sa mga kalingawan ilabi na sa kagabion.
Dugang ni Oblenda, usa usab sa dakong hagit sa buhatan ang kakulang sa traffic enforcers nga madeploy sa nagkalain-laing kadalanan sa siyudad, ilabi na karong panahon sa mga dagkong kalihukan.
Tungod niini, naglunsad ang ICPTMO og bag-ong estratehiya aron masiguro ang epektibong pag-monitor sa trapiko. Lakip niini ang duha ka shift sa mga traffic enforcers aron bisan pa sa kagabion adunay presensya sa kadalanan aron masiguro ang kaluwasan ug kahapsay sa trapiko.
Gipahimangno usab ni Oblenda nga bisan pa sa kakulang sa manpower, magpadayon gihapon ang ICPTMO sa pagpatuman sa mga pamaagi aron ma-monitor ang grabeng trapiko ug mapalambo ang dagan niini alang sa kaayohan sa tanan.
Photo courtesy to: Iligan City Traffic and Parking Management Office LGU – Iligan
