Gibasol sa Department of Labor and Employment (DOLE) ang sunod-sunod nga pag-igo sa mga kalamidad niadtong Oktobre isip hinungdan sa pagsaka sa ihap sa mga walay trabaho sa nasud.
Sumala ni DOLE Secretary Bienvenido Laguesma, temporaryo ra ang maong pagsaka sa unemployment ug anaa gihapon kini sulod sa 4.8 hangtod 5.1 porsyento nga target sa gobyerno alang sa 2025.
Dugang sa kalihim nga dili malikayan ang paglabay sa mga kusog nga bagyo sukad sa bulan sa Setyembre, lakip na ang bagyong Mirasol, Nando ug Opong, nga nakaapekto sa daghang negosyo ug panginabuhian sa nagkalain-laing rehiyon sa nasud.
Matod pa, ang epekto sa mga kalamidad maoy usa sa mga hinungdan nga hinay ang pagbalik sa operasyon sa pipila ka establisemento, hinungdan nga adunay mga trabahador nga nalangan o nawagtangan og trabaho.
Kahinumduman nga gipagawas sa Philippine Statistics Authority (PSA) ang resulta sa Labor Force Survey niadtong Oktubre, nga nagpakita sa pagsaka sa unemployment rate ngadto sa 5 porsyento, o kapin 2.54 milyones ka mga Pilipino ang wala’y trabaho.
Photo Courtesy to: Serbisyo
