Nag courtesy call ang Commander Coast Guard Station Davao Oriental uban sa Chief of Staff ngadto kang Mayor Kaka Bulaong kini alang sa pagpausbaw sa maritime safety didto sa Municipal Hall, Barangay Central, Tarragona, Davao Oriental niadtong Disyembre 17, 2025.
Ang pagbisita gitumong sa pagpalig-on sa kaandam sa operasyon ug presensya sa mga personahe sa Philippine Coast Guard sa kadagatan o mga baybayon sa munisipyo sa Tarragona. Kini nga lakang nagsilbi nga pormal nga presentasyon ug diskusyon sa sugyot alang sa pagtukod ug pagpaaktibo sa Coast GuardSub-Station Tarragona nga usa ka hinungdanon mga inisyatiba.
Ang gisugyot nga sub-station gilauman nga makapauswag sa seguridad sa kadagatan, pagpatuman sa balaod, pagpanalipod sa kinaiyahan sa dagat ug kaluwasan sa kinabuhi. Pinaagi sa pagpaaktibo niini makahimo kini sa mas dali nga pagtubag sa mga insidente o emerhensya sa kadagatan, mas duol nga koordinasyon sa lokal nga mga otoridad ingon man sa dugang nga proteksyon alang sa mga mangingisda, seafarer ug mga residente sa baybayon.
Gani, nagbarog isip simbolo sa hiniusang pagpangulo ug kolektibong aksyon ang gisugyot nga pagtukod sa Coast Guard Sub-Station Tarragona, diin kini dakong tabang sa pagbantay sa kadagatan sa munisipyo.
Ang maong proactive nga aksyon nagpakita sa tinuoray nga pagpakabana sa lokal nga kagamhanan alang sa maritime safety, coastal security ug sa kaayohan sa mga konstituwente niini, ilabina niadtong kansang nanginabuhi sa kadagatan.
