Nadugangan ang ihap sa mga munisipalidad sa proninsya sa Zamboanga del Sur nga gi-categorized sa DOH Region 9 pinaagi sa IPHO Zamboanga del Sur isip Zero Open Defecation category.
Atol sa Media forum, gipaambit ni Genevieve Tapodoc, Provincial Sanitary Inspector nga karon anaa na sa kinse ka mga munisipalidad o katumbas sa 504 ka mga barangay ang na-categorized isip Zero Open Defecation.
Kini nga mga lungsod gilangkuban sa Pitogo, Tabina, Vincenzu Sagun, Guipos, Josefina, Midsalip, Sominot, Ramon Magsaysay, Labangan,Lakewood,Molave, San Miguel,Tambulig, Tukuran ug lungsod sa Bayog.
Matod ni Tapodoc, ang lungsod nga na categorized isip Zero Open Defecation nagpasabot sa syento porsyento nga pagbaton ug mga kasilyas sa tanang mga panimalay.
Ang Zero Open Defecation (ZOD) usa ka status nga nakab-ot sa usa ka komunidad kung ang mga panimalay wala na magpraktis sa bukas nga pagbawas nga wala mugamit ug kasilyas.
Sa Zero Open Defecation status, diha sa komunidad wala nay makita nga hugaw sa tawo sa mga environmental places sama sa kalibunan o sa mga kasapaan.
Sa karon matod ni Tapodoc ilang buhatan naningkamot nga dili lang kutob sa pagkab-ot sa Zero Open Defecation category ang ma-angkon sa mga munisipalidad sa Zamboanga del Sur apan lakip na usab ang highest grade level sa environmental sanitation.
