Liboan ka mga tao ang napugos sa pagbakwit sa utlanan sa Thailand ug Cambodia human misugod ang grabeng panagbangi tali sa duha ka nasod, sumala sa lokal nga media.
Gisirad-an sa Thai authorities ang liboan ka eskwelahan sa unom ka probinsya duol sa utlanan, diin ang uban gihimo’g temporaryo nga shelter alang sa mga napugos sa pagbakwit.
Sugod Lunes, ang panagbangi mipatay na og labing menos 10 ka tawo—7 sibilyan sa Cambodia ug 3 sundalo sa Thailand. Daghan ang nasamdan sa duha ka nasod.
Sumala sa Thai Education Minister, kompleto ang mga shelter sa higdaanan, pagkaon, tubig, kuryente, sanitasyon, ug lugar alang sa kabataan. Sa Cambodia, gitukod ang mga safe center ug gipabalhin ang liboan ka pamilya.
Makita sa mikatap nga video ang usa ka pamilya( (duha ka babaye ug tulo ka bata) nga mitago sa drainage ditch samtang nagpadayon ang gubat, nga gisugdan sa airstrikes sa Thailand human sa alegasyon nga gisulong sila sa Cambodia.
SOURCE: PNA
