Subling gipadangat sa hawanan sa konseho ang kahasol nga masinatian sa mga senior citizens sa syudad ayha makatamgamtam og tukmang diskwento diha sa ilahang pagpamalit og tambal.
Sa special report ni Konsehal Gilda Go, nangulo sa komitiba sa Senior Citizens, nga daghan na gane mga kabus nga senior citizens ang dili halos makapalit ug makakompleto sa ilahang gikinahanglang tambal, madugangan pa ang ilahang kahasol kung pangitaan pa sila og purchase booklet ayha maka-avail sa baynte porsyento nga diskwento.
Saysay pa sa Konsehal nga anaa na man ang Department of Health Administrative Order no. 2024-0017 nga nagwagtang sa purchase booklet isip mandatoryong requirements alang sa diskwento subay na sab sa Republic Act 9994 kon Expanded Senior Citizens Act, apan daghan gihapong mga botika ang wala nagasunod niini nga kamanduan.
Tungod niini, gihangyo ni Konsehal Go nga pakusgan ang pag-implementa niini nga kamanduan sa DOH ug sa nagtunhay nga balaud kung asa gihangyo sa konsehal nga ilakip ang daghang mga buhatan sama sa Department of Health Center for Health Development – Northern Mindanao alang sa lapad nga pagpasabot sa balaud, Regulatory compliance board nga hugot nga magmonitor ug ang Office of the Senior Citizen Affairs kon OSCA alang sa reporting ug adbokasiya.
Photo courtesy: PEP.ph
