Mipahayag si Mayor Nelson “Tata” Sala, nga wala siyay problema sa nagpadayon nga imbestigasyon ug andam siyang moagi sa proseso sa NBI ug PNP aron mahinloan ang iyang pangalan.
Giklaro sa mayor nga nasayod siya sa nagkadaghan nga mga akusasyon nga naggawas sa social media batok niya, apan iyang hangyo nga dili apilon ang iyang pamilya sa maong mga isyu.
Dugang pa niya, walay rason nga makabuhat siya og daotan kang Kapitan Oscar “Dodong” Bucol Jr. kay tarong kining nagpuyo, pareho silang public official, ug maayo usab ang dagan sa iyang kaugalingong panginabuhi.
Gidugang usab ni Mayor Sala nga natural lang sa iyang pagkatawo ang pagka-maldito nga bahin sa iyang kinaiya, apan wala niya kini gamita sa pagbuhat og daotang binuhatan. Mitugot siya sa tanang imbestigasyon aron mapamatud-an nga walay kalabutan ang iyang pangalan sa maong kontrobersiya.
