Balhog sa prisuhan ang usa ka lalaki kinsa nasakmitan ug armas atol sa gipahigayon nga search warrant operation sa kapulisan sa Brgy. Tabayo, lungsod sa Siocon, Zamboanga del Norte niadtong Disyembre 7 ning tuiga.
Giila ang dinakpan nga si alyas Bojek, 36-anyos, minyo, usa ka mag-uuma ug residente sa maong dapit.
Nasakmit gikan sa dinakpan ang usa ka unit sa calibre 45 nga pistola nga walay serial number, ug usa ka magazine nga adunay 4 ka buhing bala.
Gipahigayon ang maong operasyon pinaagi sa mga personahe sa Siocon MPS kauban ang 2nd ZNPMFC ug 901st RMFB9 pinasikad sa search warrant nga gipagula sa Acting Presiding Judge sa 4th MCTC, 9th Judicial Region, Siocon Zamboanga del Norte pinetsahan ug Disyembre 3, 2025.
Ang nakumpiska nga armas giturnover ngadto sa Zamboanga del Norte Forensic Unit, Liloy Satellite Office alang sa Ballistic Examination samtang ang dinakpan anaa sa kustudiya sa Siocon MPS alang sa tukmang disposisyon.
Photo Courtesy: Siocon MPS
