Mipahibalo ang Department of Agriculture (DA) sa pagdili sa importasyon sa tanang matang sa baboy ug pork products gikan sa Taiwan. Ang maong lakang gisugdan pagkahuman sa kompirmasyon sa pagkaylap sa African Swine Fever (ASF) sa nasangpit nga nasud.
Matod ni Agriculture Secretary Francisco Tiu Laurel Jr., ang moratorium gihimo sa walay langan aron mapanalipdan ang lokal nga industriya sa baboy, nga nagkantidad ug bilyon-bilyong piso. “Kini usa ka preventive measure aron mapugngan ang pagbalik sa ASF sa Pilipinas, nga makadaot sa ekonomiya ug sa panginabuhian sa mga mag-uuma,” matod pa niya.
Ang pagdili naglakip sa tanang buhi nga baboy, pork products, panit sa baboy, ug bisan ang semilya nga gigamit alang sa artipisyal nga insemination sa mga baboy. Dungan niini, awtomatikong gikansela sa DA ang tanang na-isyu nga permit alang sa importasyon sa pork products gikan sa Taiwan.
Gipanghimangnoan sa DA ang publiko ug mga negosyante nga ipatuman gyud ang ban aron malikayan ang pagtabok sa ASF sa nasud ug maprotektahan ang industriya sa baboy nga usa sa mga haligi sa lokal nga agrikultura.
via: DA
