Giapod-apod sa local nga Kagamhanan sa Dakbayan sa Lapu-Lapu ang rental subsidy ug cash-for-work assistance alang sa mga residente nga naigo sa lain-laing insidente sa sunog sa dakbayan.
Nakabenepisyo ang 37 ka tag-iya sa balay nga hingpit nga nadaot sa sunog, diin matag usa nakadawat og ₱15,000 nga rental subsidy. Ang mga recipient naglakip sa 17 ka residente sa Kagudoy, Barangay Basak, ug 20 ka residente sa Zone 1, Barangay Buaya, nga naapektuhan sa sunog niadtong Nobyembre 17, karung tuiga. Ang maong subsidy katumbas sa ₱5,000 matag bulan sulod sa tulo ka bulan, aron makatabang kanila sa pagpangita og temporaryong puy-anan.
Gihatagan usab og bayad ang 15 ka trabahante gikan sa Sitio Matab-ang, Barangay Marigondon, ubos sa CDRRMO Cash-for-Work Program. Kining mga trabahante mitabang sa pagdumala sa evacuation center ug sa limpyo operasyon human sa sunog niadtong Oktubre 2 nig tuiga. Matag usa nakadawat og ₱7,032.60, base sa minimum wage alang sa 15 ka adlaw nga trabaho.
Ang maong tabang personal nga gi-turn over ni Mayor Cindi King-Chan, uban sa CDRRMO ug City Social Welfare and Development Office, isip kabahin sa padayon nga paningkamot sa syudad sa pagtabang sa mga pamilya nga nag-bangon gikan sa kalisod nga dala sa sunog.
