Mokabat sa 95 ka Person Who Use Drugs (PWUDs) ang migradwar sa Community-Based Drug Rehabilitation Program (CBDRP) nga gipahigayon sa Barangay Poblacion, Gym, Iligan City.
Ang mga bag-ong migradwar nagikan sa nagkadaiyang barangay sama sa Tambacan, Tomas Cabili, Poblacion, Sta. Filomena, Kabacsanan, ug Hindang.
Sa mensahe, ni Rowel Rubio – Head sa Iligan City Anti-Drug Abuse Council (ICADAC), nagpadayag sa iyang paglaom nga ang mga PWUDs makaangkon og bililhong kahibalo ug tinuod nga paglamdag gikan sa serye sa mga lektyur ug program session.
Malaumon si Rubio nga kini maghatag kanila og tukmang giya aron makapadayon sa usa ka bag-ong kinabuhi, nga layo sa paggamit ug pagpamaligya sa ginadiling droga.
Human sa pormal nga pagpanumpa, ang mga migradwar gihatagan og bugas ug grocery items isip pag-ila sa ilang paningkamot, determinasyon, ug pagka-positibo nga tapuson ang proseso sa rehabilitasyon nga usa ka lakang padulong sa mas limpyo, mas hapsay, ug mas hayag pa nga kaugmaon.
