SIBULAN PORTER ASSOCIATION, GIPALIGON PINAAGI SA ENVIRONMENTAL LAWS UG TREKKING GUIDELINES

Gipahigayon ang usa ka refresher course alang sa Apo Sandawa Porter Association sa Sibulan, Sta. Cruz, nga gipangunahan sa Sibulan Barangay Council ug Cluster 2 Tribal Council aron mapaligon ang kahibalo ug kahanas sa mga porter sa lugar.

Ang kalihokan gitabangan pagdumala sa Protected Area Superintendent’s Office ug sa Sta. Cruz Tourism Office, diin ilang gihatagan og tukmang pagtuki ang nag-unang environmental laws ug policies nga may kalabutan sa pagpanalipod sa kinaiyahan sa Mount Apo Natural Park.

Gipaambit usab sa mga facilitator ang mga guidelines sa portering ug guiding base sa Unified Trekking Policy, nga naglatid sa husto ug standard nga proseso sa pag-asikaso sa mga mountaineers, pagmanage sa trail, ug paggarantiya sa kaluwasan sa tanang mosaka sa bukid.

Matod sa organizers nga ang maong refresher course usa ka lakang aron masiguro nga ang mga porter andam, disente, ug tugma sa balaod ang ilang pagserbisyo, ilabi na sa panahon sa taas nga trekking season sa Mount Apo.

Nagpadayon ang lokal nga panggamhanan sa Sta. Cruz sa pagpasiugda og training ug awareness programs aron maprotektahan ang kinaiyahan ug masuportahan ang malinawon nga turismo sa rehiyon.

SOURCE: STA. CRUZ TOURISM