Patay ang usa ka kinse anyos nga batang babaye human kini naghunos sa kaugalingong kinabuhi sa Barangay Tubod, Lakewood, Zamboanga del Sur, niadtong nakalabay nga adlaw.
Matod sa inahan sa biktima, napalgan nalang niya iyang anak nga babaye sulod sa ilang balay nga nagbitay. Dali nga nagpakitabang ang inahan ngadto sa kapulisan ug sa mga personahe sa Lakewood Rural Health Unit aron makuha ang biktima gikan sa gikahimutangan niini.
Nakumpirma usab sa attending physician nga walay foul play ang kamatayon sa biktima nga karon gipahiluna na sa kabanay alang sa saktong pagpahulay.
Nasuta nga nakasinati og kaguol ang biktima gumikan sa wala pagpalit sa inahan sa gipangayo niining laptop nga gisundan pa sa panaglalis tali sa igsoon gumikan sa pagkawala sa 10 peso coin.
Sa gabie nga wala pa gihimo sa biktima ang paghunos sa kinabuhi, nagbilin kini ug pulong ngadto sa iyang kaig-agawan nga katapusan na matod pa nila ang gihimong bonding kauban niya.
Dungan niini, nagpahimangno ang kapulisan sa mga ginikanan nga kun adunay anak nga nakasinati og kaguol dili kini pasagdaan, hinoon kanunay kining kumustahon isip pagpakita sa suporta dili lang sa pinansyal lakip na sa moral.
Photo for illustration credits to:NOW Jakarta
