Gipahibalo Department of Trade and Industry (DTI) niadtong Biyernes nga ipatuman dayon nila ang price freeze sa tanang batakang panginahanglan sa tibuok nasud human sa deklarasyon ni Presidente Ferdinand “Bongbong” Marcos Jr. og State of National Calamity tungod sa kadaot nga gipahinabo sa Bagyong Tino.
Sumala sa DTI, ang price freeze maglakip sa mga importanteng produkto, lakip na ang: Mga de-lata nga isda sama sa sardinas, Instant noodles, Bottled water, Bread, Processed milk, Coffee, Mga kandila, Labada ug detergent nga sabon, ug Asin.
Ang price freeze magpabilin sulod sa 60 ka adlaw, o hangtod nga tangtangon sa Presidente, matod sa ahensya.
Gipahayag usab sa DTI nga nakig-alayon kini sa tanang may kalabutan nga ahensya ubos sa National Price Coordinating Council (NPCC) aron mapanalipdan ang mga konsumidor niining kritikal nga panahon. Dugang pa, ang ahensya nakigtambayayong sa mga tiggama, retailer, ug distributor aron masiguro ang igo ug padayon nga suplay sa mga batakang produkto sa tibuok nasud.
Kini nga lakang nagtumong sa pagpugong sa pagsaka sa presyo ug pagsiguro sa pagkabarato sa mga kinahanglanon nga produkto alang sa mga Pilipino nga naapektuhan sa miaging bagyo.
via: PIA
