Nakakuha ang Smart Communications Inc., ang wireless giant sa Pilipinas, sa una niini nga green loan nga nagkantidad og ₱2 bilyon aron pondohan ang pagpalapad sa 5G network sa tibuok nasud.
Sumala sa PLDT Inc., ang namunuan nga kompanya sa Smart, ang maong pautang gikan sa Metropolitan Bank & Trust Co. (Metrobank) ug gitawag kini nga green loan tungod kay nagpasalig ang Smart nga ang paggamit sa ilang 5G assets makatabang sa pagtaas sa energy efficiency sa paghatag og konektibidad sa mga konsumidor.
Matod ni PLDT chief financial officer Danny Yu, ang 5G network mas paspas sa pagdala sa data ug mas gamay og enerhiya nga magamit sa matag gigabyte nga ipadala kumpara sa 4G. Tungod niini, makasinati ang mga konsumidor og mas paspas nga pag-load sa apps, dula, ug mga video — nga nagresulta usab sa mas ubos nga konsumo sa kuryente.
Sa estratehiya sa Smart, gitinguha sa kompanya nga mapamub-an ang greenhouse gas emissions og hangtod 40 porsiyento sa tuig 2030 base sa datos niadtong 2019.
Si Rommel Dionisio, Metrobank corporate banking group head, miingon nga nagdesisyon ang bangko nga palapdan pa ang ilang suporta sa PLDT Group pinaagi sa laing green loan, subay sa ilang prinsipyo sa pagpalambo sa mga proyektong makahatag og benepisyo sa nasud.
Niadtong miaging tuig, nakadawat usab ang PLDT og ₱4 bilyon nga green loans gikan sa Metrobank aron palapdan ang broadband coverage sa nasud ug magamit sa pagpatuman sa energy-saving systems sa ilang mga pasilidad.
Sa kinatibuk-an, nagpasalig ang PLDT nga magpadayon sa paggamit sa green technologies aron mapaayo ang energy efficiency ug maminusan ang carbon emissions. Lakip niini ang paggamit sa renewable energy sa ilang mga pasilidad ug green radio technology nga gigamhan sa artificial intelligence (AI) aron mapadayon ang operasyon sa mga wireless site sa mas episyente ug eco-friendly nga paagi.
Photo Courtesy to: Philstar.com
