Nagpahibalo ang Government Service Insurance System o GSIS nga magpahigayon kini og emergency loan program alang sa mga miyembro nga apektado sa bagyong Tino ug sa posibleng epekto sa super typhoon Uwan.
Matod sa GSIS, ang bag-ong aplikante mahimong makapahulam og ₱20,000, samtang ang anaa nay existing loan makapahulam hangtod ₱40,000, diin kuhaan ra ang utang nga balanse aron makuha ang net nga ₱20,000.
Kinahanglan nga aktibong empleyado ang aplikante, dili naka-leave without pay, ug adunay tulo ka bulan nga nabayrang kontribusyon sulod sa miaging unom ka bulan. Kinahanglan usab nga walay kaso ug may take-home pay nga ₱5,000 pataas human sa deduction.
Apil usab nga maka-avail ang mga old-age ug disability pensioners basta adunay 25% nga nabilin sa ilang pension human sa loan deduction. Bayaran ang utang sulod sa 36 ka bulan pinaagi sa salary o pension deduction, uban sa 6% annual interest.
Ang aplikasyon mahimong buhaton pinaagi sa GSIS Touch mobile app gikan Nobyembre 7, 2025 hangtod Pebrero 7, 2026. Samtang, giingon sa PAGASA nga ang bagyong Fung-wong, nga pagangalanan nga Uwan pag-abot sa PAR, posible nga mosulod sa nasud sayo nga bahin sa adlawong Sabado.
SOURCE: ABS CBN NETWORK
