Duha ka mga indibidwal ang nadakpan sa managlahing operasyon human nalambigit sa illegal number games o mas nailang “Swertres” sa may Barangay Lower Salug Mahayag, Zamboanga del Sur, adlaw’ng Miyerkules, Nobyembre 5, 2025.
Gihimo ang operasyon sa pagpanguna sa CIDG Zamboanga del Sur kauban ang Mahayag MPS nga miresulta sa pagkasikop sa 57 anyos ug 50 anyos nga mga lalaki nga managsamang residente sa nahisgutan nga lugar.
Nakumpiska gikan sa posesyon sa mga suspetsado ang mga betting stubs, tally sheets, sling bag, black pen, bet money ug kwartang nagkantidad ug 970 pesos.
Ang duha ka mga suspetsado pakyas nga nakapresentar ug dokumento gikan sa Philippine Charity Sweepstakes Office (PCSO) nga naghatag pagtugot aron makapadula ug number games.
Ang duha ka mga suspetsado susama nga gidala sa CIDG Zamboanga del Sur alang na sa tukmang lakang.
