Gibutyag ni PNP chief Lt. Gen. Jose Melencio Nartatez Jr. nga andam ang PNP sa pagpakatap ug mga personahe alang sa pag-obserbar sa All Saints’ ug All Souls’ Days karong umaabot nga Nobyembre 1 ug 2.
Kalabot niini, gimanduan usab niya ang tanang unit sa tibuok nasud nga patas-on ang patrol operations, lakip na sa mga residential areas ug business establishments. Samtang nagpahinomdum usab ni Nartatez ngadto sa publiko nga mag-amping sa paggawas sa ilang mga panimalay.
Nasayran nga mokabat sa 31,200 ka mga opisyal ang ipakatap sa 5,065 ka sementeryo, memorial parks ug columbaria, ingon man mga dagkong dalan nga sugdan karong Oktubre 29 hangtod Nobyembre 3. Anaa usab ang dugang nga personahe nga mukabat sa 11,700 ka uniformed personnel gikan sa Armed Forces of the Philippines, Bureau of Fire Protection, ug Philippine Coast Guard.
Sa pikas bahin, gibutyag ni National Capital Region Police Office chief Maj. Gen. Anthony Aberin nga ipakatap usab ang 8,575 ka mga personahe gikan sa lima ka police districts, regional headquarters, regional mobile force battalion ug support units ang ibutang sa mga sementeryo, mga hub sa transportasyon, mga lugar sa pagsimba, mga dagkong dalan, rally convergence points ug uban pang mga lugar sa publikong kongregasyon. Ipakatap usab ang laing 29,900 ka force multipliers sama sa mga barangay tanod, radio groups ug non-government organization volunteers.
Photo courtesy to:Tempo
