Walo sa matag napulo ka Pilipino, o 80%, ang gusto gihapon nga magpabilin ang demokrasya sa nasud bisan pa sa mga kakulangan niini, sumala sa pinakaulahi nga survey sa OCTA Research.
Base sa Q3 2025 Tugon ng Masa (TNM) survey, 18% lang ang wala mosugot ug 2% ang dili sigurado sa ilang panglantaw bahin sa demokrasya.
Bisan pa niana, upat lang sa matag napulo ka Pilipino, o 41%, ang niingon nga kontento sila sa paagi sa pagpatuman niini sa nasud, samtang 31% ang dili malipayon ug 26% ang nagpabiling walay klaro nga opinyon.
Matud pa sa report sa OCTA niadtong Sabado “Ang pagtuon nagpakita sa duha ka magkasumpaki nga panglantaw sa mga Pilipino: lig-on ang pagtuo sa demokrasya isip prinsipyo, apan huyang ang katagbawan sa resulta niini”.
Dugang pa sa think tank, nagpabilin nga lig-on apan “kondisyonal” ang pagsalig sa publiko sa demokrasya o nagdepende sa kaepektibo sa pagdumala, pagkamay-tulubagon, ug serbisyo publiko.
Gihimo ang survey gikan sa Setyembre 25 hangtod 30, 2025 pinaagi sa face-to-face interviews sa 1,200 ka respondents nga nag-edad og 18 pataas. Adunay ±3% margin of error sa 95% confidence level.
Pinakataas ang suporta sa demokrasya sa Balance Luzon (84%), ug pinakaubos sa Visayas (72%). Sa mga rehiyon, nanguna ang Northern Mindanao (95%), gisundan sa CAR (92%) ug Bicol (92%). Pinakataas ang wala mosugot sa Mimaropa (44%) ug Negros Island Region (40%).
Pinakalig-on ang suporta gikan sa Class D (81%), sunod ang Class E (78%) ug Class ABC (75%).
Pinakataas usab ang katagbawan sa demokrasya sa Balance Luzon (55%), samtang pinakaubos sa Visayas (25%). Dili usab malipayon ang mga taga-Visayas (44%) ug Mindanao (39%).
Matud pa sa OCTA, ang pagpadayon sa mga Pilipino sa pagpabili sa demokrasya bisan pa sa pagkadismaya usa ka senyales sa “civic maturity.”
Dugang pa sa OCTA nga wala gisalikway sa mga Pilipino ang demokrasya — gipangayo nila ang kausaban nga makapalig-on niini. Ang demokrasya sa Pilipinas nagpabiling lig-on, dili tungod sa buta nga pagkamaunongon, kondili sa paglaum nga makabaton og reporma, hustisya, ug pagkaparehas.
Photo courtesy: ASEAN PARLIAMENTARIANS FOR HUMAN RIGHTS
