Lain-laing klase sa armas ug mga bala ang nabawi sa kapulisan sa gikasang search warrant operation batok sa usa ka mag-uuma sa Purok 14, Sitio Cudilog, Barangay Poblacion, Dimataling, Zamboanga del Sur, adlaw’ng Huwebes, Oktubre 23, 2025.
Gikasa ang operasyon sa pagpanguna sa ZSPIU, Dimataling MPS, 2nd ZSPMFC, 902nd RMFB9, 55th SAC, 5th SAB PNP SAF, ug 53rd Infantry Battalion nga miresulta sa pagkasikop sa usa ka 50 anyos nga lalaki mag-uuma nga residente sa nahisgutan nga lugar.
Ang search warrant gi-isyu sa Presiding Judge sa RTC Branch 29, San Miguel, Zamboanga del Sur, pinetsahan kaniadtong Oktubre 14, 2025, gumikan sa paglapas sa R.A. 10591 (Comprehensive Firearms and Ammunition Regulation Act).
Nalangkob sa nabawi sa operasyon ang usa ka M16 rifle nga may magazine loaded sa 13 ka buhing bala, lima ka magazine loaded sa 99 ka buhing bala, usa ka carbine rifle nga may magazine loaded sa 20 ka buhing bala, usa ka magazine sa caliber 45 pistol loaded sa unom ka buhing bala, usa ka green sling bag ug usa ka black bandolier.
Ang mga nakumpiskang armas ug bala gipresentar una sa issuing court ug giturn-over ngadto sa Zamboanga del Sur Provincial Forensic Unit 9 alang sa ballistic examination samtang ang suspetsado nakakustudiya na sa Dimataling Municipal Police Station alang sa pagpasaka sa tukmang kaso.
Photo courtesy to:Dimataling Municipal Police Station
