Nagpahimangno ang Ayala-led Bank of the Philippine Islands (BPI) sa nag-uswag nga mga high-tech scams nga naggamit og hardware ug artificial intelligence (AI) aron targeton ang mga kustomer sa digital banking sa Pilipinas.
Sa usa ka cybersecurity briefing, giingon ni BPI enterprise information security officer Jon Paz nga bag-o pa lang nagsugod ning mga pamaagi karong tuiga, ug kini nagpasabot og peligroso nga pagtaas sa ka-komplikado sa mga digital scams nga nag-atake sa mga kliyente sa bangko.
Usa sa pinakadelikado nga nadiskobrehan mao ang IMSI International Mobile Subscriber catchers, mga portable nga device nga nagpakaaron-ingnon nga lehitimong cell towers aron magpadala og text messages nga daw gikan sa opisyal nga numero sama sa BPI, ubang financial institutions, o government hotlines.
Ang mga pekeng signal dili moagi sa telecom system, lisod masubay o mapugngan, busa labi pa kini nga peligroso. Gipakita usab nga gagmay ra ang mga devices ug pwede madala sa backpack o sakyanan. Naangkon kini sa mga langyaw, lakip na ang mga Chinese nga giingong nalambigit sa ilegal nga operasyon.
Gisuportahan sa BPI ang plano sa National Telecommunications Commission (NTC) nga ihunong ang paggamit sa 2G ug 3G networks nga dali ra ma-hack sa ingon ani nga mga device.
Gipahimangnoan usab ang publiko bahin sa bag-ong mga scam nga naggamit og peke nga eGov o government app update notifications aron matintal ang mga user sa pag-install og malisyosong software.
Dako ang epekto sa ekonomiya sa mga digital fraud. Base sa datos sa Global Anti-Scam Alliance, gipasabot ni Paz nga nawad-an ang mga Pilipino og P460 billion tungod sa scams sa 2024, nga katumbang sa 1.9 porsyento sa gross domestic product (GDP) sa nasud.
Photo Courtesy to: Philstar.com
