Gibasura sa Pasig Regional Trial Court (RTC) Branch 159 ang bag-ong hangyo ni Pastor Apollo Quiboloy, founder sa Kingdom of Jesus Christ (KOJC), nga hospital arrest.
Sumala sa mando nga gipagawas niadtong Oktubre 8, wala’y “compelling reason” ang korte aron ibalhin si Quiboloy sa Philippine Health Center o Medical City alang sa hospital arrest.
Giingon sa korte nga klaro nga natuman ug naserbisyohan ang mga medikal nga panginahanglan ni Quiboloy samtang siya naa sa kustodiya sa Pasig City Jail.
Klaro kaayo sa iyang mga rekord nga ang iyang medikal nga panginahanglan dali ug padayon nga natubag samtang naa sa kustodiya sa Pasig City Jail, ug padayon siya nga nakadawat og angay, tukmang oras, ug igo nga medikal nga pag-atiman sa ospital ilalom sa pagdumala sa mga kwalipikado nga medikal nga propesyonal.
Sa miaging tuig, gibasura na sa Pasig court ang hangyo ni Quiboloy para sa hospital arrest. Sa ilang kampo, giingon nga nag-antos siya og lisod nga pagginhawa, balik-balik nga hilanat, kasakit sa kasu-kasuhan, ug pag-ubo samtang naa sa presohan.
Ang kaso ni Quiboloy nga gisuspetsahan sa qualified human trafficking nga walay piyansa gihawiran sa Pasig Regional Trial Court. Ang gikatakdang pagdungog kagahapon gi-reschedule na sa Disyembre 11.
Photo Courtesy: Philippine News Agency
