Gipahigayon sa City Government of Digos ang usa ka Mental Health Awareness Orientation niadtong Oktubre 17, 2025, sa Dawis Heritage Wharf Multi-Purpose Building. Ang maong kalihokan gipasiugdahan sa City Human Resource Management Office (CHRMO) aron mapalambo ang mental nga kahimsog ug matabangan ang mga empleyado sa pagdumala sa tensiyon ug stress sa ilang trabahoan.
Gibahin kini sa duha ka sesyon buntag ug hapon aron ma-accommodate ang mga partisipante gikan sa lain-laing buhatan sa lokal nga kagamhanan. Ang matag sesyon naghatag og interaktibo ug makapadasig nga kat-onan nga nagtugot sa mga empleyado nga magpamalandong sa ilang kaugalingong mental well-being.
Si Dr. Glenn Glarino, Dean sa School of Arts and Sciences sa University of San Carlos, maoy nagsilbing resource speaker atol sa oryentasyon. Gitutokan sa iyang lecture ang stress management ug workplace mental health, diin iyang gipatin-aw ang siyentipikong aspeto sa stress, ang lain-laing pagsabot niini, ug ang mga praktikal nga pamaagi aron malikayan kini.
Pinaagi sa direktiba ni Mayor Josef Cagas, nagpadayon ang LGU Digos sa pagpaningkamot nga makabuhat og usa ka malipayon, produktibo, ug lig-on nga workforce. Ang programa nagpamatuod sa dedikasyon sa LGU sa holistic employee development ug sa pagpalambo sa maayong kalidad sa publiko nga serbisyo.
SOURCE: CITY GOVERNMENT OF DIGOS
