Nagtanyag og tabang ang Philippine Chamber of Commerce and Industry (PCCI) sa Department of Public Works and Highways (DPWH) aron motabang sa pagbantay sa mga proyekto sa imprastraktura taliwala sa isyu sa korapsyon sa mga flood control projects.
Atol sa ika-51 nga Philippine Business Conference, gisulti ni PCCI Chairman Ferdinand Ferrer kang DPWH Secretary Vince Dizon nga adunay mga PCCI chapter sa tibuok nasud nga mahimong magsilbing mata ug dalunggan sa ahensya sa mga proyekto. Matod niya, kung sayo pa nahibal-an sa pribadong sektor ang pagkalangan o iregularidad sa mga proyekto sama sa classrooms ug flood control, dali unta kining naaksyonan.
Malipayon usab nga gidawat ni Sec. Dizon ang tanyag, dungan sa paghisgot nga moabot sa 20,000 ka proyekto ang gi-monitor sa DPWH.
Kauban niini, gipahibalo ni Dizon nga tabangan sa Converge ICT ubos sa pagpangulo sa Chief Executive Officer niini nga si Dennis Uy ang DPWH sa paghimo og online transparency portal, diin makita sa publiko ang impormasyon sa matag proyekto, gikan sa budget hangtod sa pag-uswag niini.
Matod ni Dizon, tumong niini nga malikayan ang kurapsyon sa mga proyektong gihimo nga tago, ug magsilbing modelo sa kooperasyon sa gobyerno ug pribadong sektor alang sa matinud-anon ug bukas nga pagdumala.
Photo courtesy: Philippine Chamber of Commerce and Industry
